June 22, 2010
-
是日飲歌﹕
--------------
另外幫林忌打廣告，有興趣既請去搵佢參加聯署﹕
聯署要求民主黨履行押後表決兩星期的承諾（請廣傳）
民主黨之前多番表示，說要求政府押後兩星期才表決政改，讓市民有更多時間去理解方案云云；何俊仁如今卻說，決定權在政府，真的嗎？
「何俊仁指要求政府押後兩周表決政改方案
(商台)2010年6月22日 星期二 00:46民主黨主席何俊仁表示，雖然黨大會通過支持改良方案，但他會應黨員要求，向政府提出可否押後兩周表決政改方案，但承認決定權在政府，不過他認為，方案已得市民支持，只要越明白，就會有越多人支持。」
何俊仁律師，基本法附件一、附件二規定，政改必須得到立法會全體議員的三分之二才可以通過；亦因此，如果民主黨堅決要求政府押後兩星期，甚至不惜缺席會議，令政府無法掌握三分之二的多數票，那麼政府就非要答應你押後兩星期的要求不可，因為他們不夠票。
今日的民主黨，令這麼多最初願意理解你們的「改良方案」者都要高聲否決，責任就在民主黨的態度本身－－原來曾蔭權說起錨，你們就一定要起錨？原來中共說一你們就要做一，中共就二你們就二做二嗎？你們沒有自由意志的嗎？民主黨說沒有檯底交易，那麼為何你們要好似當年通過廿三條，好似要通過高鐵，好似要通過強拍一樣，急就章在市民都未知咩事，在沒有充份討論辯論的情況之下，就要強迫市民收貨呢？如果說政府以往這樣做是極度粗暴，你們今日的行為又和政府的行為有何分別？
因此，請何俊仁兌現你的承諾，給予市民兩個星期的思考時間；政府接不接納押後，的確決定權在政府；但出不出席立法會，決定權就在你自己；民主黨通過黨員大會支持你們投票，不代表你沒有自由意志去不去開會；你們決定集體不開會，特區政府就不會夠票通過，就必然要接納你們推遲兩星期的要求。
只有寶藥黨、不良銷售才會強迫人限時簽約；真金不怕洪爐火，如果真相如你們所說，怕甚麼推遲表決？如果提名權要推遲到十月你們都收貨，為何表決推遲兩星期，你們就不敢做呢？
何俊仁，靜待你的回應，請拿出行動，而非用廢話來敷衍我們。
Comments (8)
今日睇報紙後對民主黨原全失望！對司徙華覺得很忿怒！司徙華佢話涂、鄭兩人欲退黨要記住當日他們以民主黨候選人身份、得到民主黨支持者支持才能當選。那個老野short左？佢直情係當我地厘D係蟻民，唔記得議員的選票係由我地選民而來！佢以為鄭家富個位係佢送的嗎！係咪病到short左，定係佢想死前揚名立萬？我應為佢應該為以上言論向選民這歉！佢厘個言論完全使我明白點解佢地唔想扼後投票囉！佢跟本覺得佢地白鴿黨話晒事！
容我企係建制立場講野.
今日投票係投加十席立會議席同更改行政長官產生辦法,
唔係表決民主黨既所謂"改良方案".
無論支持政府原有方案既人或者支持所謂"改良方案"都支持加位既.
咁你押咩後? 距離7月表決新增五席功能組別點選都仲有個幾月, 仲唔夠時間? 咪休會之後再表決囉. 有影響今日既議案咩?
@路人乙 - 民主黨大佬文化的確是很嚴重，一向如是。尤其華叔是黨鞭，在這方面特別嚴厲。
但你話佢句說話錯，又錯唔晒。因為o係一個黨旗下參選，的確是share左黨的聲望。當民主黨聲望好時就用黨員名義參選，到黨聲望不好時就跳船，在黨的角度看自然是背叛行為。
如果「黨」對於選民投票意向沒影響，怎會有民主黨區議員考慮退黨﹖
@貓頭鷹 - 我之前已經說明得好清楚。我接受呢個方案有條件，就係政府要公開承諾取消功能組別，和說明選舉方式。依家政府兩樣野都冇做到，我反對民主黨投票通過。
我畀張文光既公開信亦講過，我接受漸進(雖然你唔認同)，但連呢兩點保證都冇就通過方案，是過分冒險，隨時畀對家出賣。民主黨可能私下同中聯辦傾，另有信任的理由，但我沒有。
@fongyun -
我冇唔認同過漸進, 但我係堅持要有路線圖, 要有目標. 要政府要公開承諾取消功能組別係天方夜譚, 佢話而家仲有好大爭議. 要政府說明選舉方式當然冇問題喇, 不過民建聯同埋功能組別都可以反對, 政府都吹佢唔漲. 過分冒險? 對你同我咪冒險囉, 但民主黨覺得信政府唔係冒險我都冇計. 我而家靜待民建聯同功能組別既反枱.
p.s.方兄當然可以相信民建聯同功能組別會讚成民主黨既低門檻建議喇, 不過我唔會去相信一d多次違反承諾既團體.
但這次並不只是黨的聲望的問題，而是涂、鄭所面對的是原則性的分野，是是否可以向選民交代的問題。
司徙大佬近日的應對讓我覺得極為失望，大家長得尤如民主黨的「阿爺」，選民都只是「教極唔明的小朋友」講唔通我地就話「一隻耳聾左」；要向選民交代的議員就要聽佢D說話「記住個位係民主黨支持的」，好似人地無做過野咁，選民又無腦，無睇政綱的；和李柱銘唔對嘴型就話人地「唔識政治」…睇到想關電視…話佢老喇，又話人地岐視老人；話佢係咪short左，又話咒佢死…天啊，之前阿邊個話佢「老人政治」我都覺要尊重佢…老，但今次有人咁講的話我會舉腳讚成。
和朋友討論起來，覺得對司徙大佬的失望，就在於佢將黨的利益（可以係唔material的利益，如關係、地位、重要性等）放高於市民的利益…而我們在他們心中只是一班無佢咁有政治手腕的蠢貨！
民主黨現在“衰落”的局面不是公民黨或社民連的責任，而是這個機構沒有做好自身的新陣代謝！
BTW，我年宵都會支持佢D墨寶，但我今次真係支持佢唔住囉…
@貓頭鷹 - 我冇相信過建制派，否則尋晚唔會走去立法會外反對。需知道我現在站在示威者當中其實相當格格不入。
@路人乙 - 講到尾都係「借黨聲望參選，同黨唔掂牙就跳船」o者。我唔係話咁樣等於缺德(我都冇鬧過鄭家富，自保是人之常情，跟民主黨投票等於you jump I jump)，只係話華叔做得黨鞭的有此反應很平常。
你話佢既野，我冇乜要反駁。因為都係事實，佢本來就是這樣的，也不是今天才有人這樣說。只是現在你們對佢特別反感而已。
於我而言，這個方案固然有民主黨的利益(正如發動公投對社民連很有利一樣)，但說這樣是出賣市民利益，我不認同。當然理由我說過不少次，是否認同則隨尊便。
(P.S. 其實我同華叔連招呼都冇打過，更不要說買墨寶，連他寫的書我也沒買過。我並不特別喜歡他、亦不討厭他，就只敬重他搞教協搞支聯會搞足那麼多年而已。)
我無話你同司徙黨鞭有乜關係，所以幫佢，你唔洗澄清喎。可唔可以咁講呢，我未必會話白鴿黨出賣市民利益，不過在佢地決策的過程就一定係遺棄左我地的期望囉！但就係厘樣野，讓我厘D投左佢地咁多年票的人極為失望囉！
不過講乜都無用，都過硬嫁喇…又一次證明我地身上係流住做賤民的血囉…
@路人乙 - 唔係澄清既，順帶一提o者。我都同意佢個決策過程係違反好多人既期望。
Comments are closed.