February 15, 2006

  • [sound bite]


     


    蔡子強在《新君王論 II》裡曾說張文光是立法會的「bite 王」，擅於製造 Quotable quotes (或標題)。一看今期《教協報》(500期)，果不期然﹕



    「……教協會一直支持教育改革，一個很重要的原因是，它最根本的精神，是不放棄每一個學生。因此，教育改革的資源，必須直接用於學生身上，改善教學環境，集中教好學生，這才是以學生利益為本。可是，政府的改革方向，表面是不放棄每一個學生，實際是不放過每一個教師。政府刻意混淆教育改革和監控管治，設計各種評核指標和監察制度，將學校變成一部人肉機器，要向官僚交數，要製造教改政績。結果，教育變成商品，學校接受層層監控，教學反而成為副業。……」
    —〈團結、奮鬥、救教育—訪問會長張文光〉


     


    L 同學無端端為我「起底」。(係喎，你仲爭我至少一份野)
    F 同學﹕點解你咁犀利，網上都搵到你個名既﹖
    我﹕其實你都得架，你寫網頁落埋自己個名，都一樣 search 到架。
    (顯然他沒有留意網絡搜尋器的工作原理)



    自戀狂如我，怎會不知道網上甚麼「底」可以起﹖
    因此也讀過某些同學的 xanga，只是﹕
    1. 某些實在令人眼花，為護眼無謂多看。(見二月四日日記)
    論美勞，他們肯定比我好﹔不過搞到文章眼花撩亂，就不等於好。
    2. 對於另一些，則不想粗言入目。乾脆眼不見為淨。
    甚至鬧我果D，我都見到，不過唔想同佢計較。唔通要搞到好似星加坡咁﹖
    邊個學生未鬧過老師﹖就差在鬧得文雅定粗鄙o者。
    (註﹕去年星加坡某學生因為用 blog 辱罵教師，被罰停課…… )


    見到幾個同學的 xanga，真覺得「sound bite」這種現象沒說錯。
    我介紹《搞笑學物理》這本書(一月二十日日記)，「精子向前衝」的章節自然就最受注意。作者在裡面引述了幾個性笑話，用意是說明青少年性知識的釜貧乏，我也順便說明一些錯誤的性觀念。


    怎料，學生的 xanga 說「方 sir 講有味笑話」……唉﹗
    然後另一班的學生問﹕「方 sir 點解唔同我地講咸濕笑話﹖」……唉唉﹗



    今天 L 組員介紹她的中二同學來問我﹕
    「有隻化學品呢，個名好長架，叫 2,4-乜乜，你知唔知個全名呀﹖」
    這個問題相信可以成為《江山狀元爭霸戰》的終極題目。
    天啊﹗世上咁多化學品以「2,4-」開頭，我鬼知妳想問邊隻咩﹖﹗


    跟著我突然想起劉大導當「粗口」用的那個……
    我﹕係唔係「2,4-dihydrophenylhydrazine」﹖呢個 A-Level 先讀架喎﹗
    她﹕咁呢隻野中文名叫乜﹖係用黎做乜架﹖
    又一個天啊﹗ 我離開 A-Level (甚至 year 1 org chem) 好多年啦喎。(更何況我唔係讀中文既……)
    我淨係記得呢舊野應該係染料，可以用黎測試反應進行既程度諸如此類……


    跟住我諗住去查下參考書，點知本本書既 index 都唔見呢隻野……
    然後我聽到有幾個睇緊報紙既高班學生講﹕「點解咁樣都會傳染既﹖」


    我以為佢地講緊禽流感，轉頭一睇，眼前見到「肛交」同「性傳染病」。
    我﹕「梗係會啦﹗眼耳口鼻都會傳染架啦﹗」
    (注意﹕此句屬誇張法)
    學生突然發現我在身邊嚇了一跳﹕「o下﹖﹗但係佢冇流血喎。」
    我﹕「唔需要流血架。肛門(同直腸)係黏膜黎架嘛﹗皮膚係隔水既，但係所有黏膜都透水，病毒病菌都好容易透過，所以就算用口都會傳染到。」
    (又注意﹕此句屬「高度簡化」解釋，相信胡兄遲點會修理我的了。其實皮膚也不是沒有傳染性病的可能，例如疣。)


    原來連高年級學生的性知識也是如此水平……唉唉唉﹗



    (依家上網查番先發現應該係 2,4-dinitrophenylhydrazine (中文名「2,4-二硝基苯
    胼」)。不過對於用途，我雖然記得唔清楚，都總算冇錯到。)


    ---


    我有時懷疑，電腦科既功課其實應該分左逐次收，而唔係一次過收。因為呢家D人(其實唔止學生)冇乜整體觀念，個個等人踢一腳先郁一步。就算唔計之前果D，果份「終極功課」難到死(唔好講學生，我見到都覺得毫無頭緒)，班友仔/女咁樣拖到四月，肯定尾大不掉。


    --------------


    天呀，翻查之下，發現我篇區區中六文化科報告《中西天文學的比較》竟然俾台灣人用左黎討論科學史教育﹕
    http://plog.tces.chc.edu.tw/plog/resserver.php?blogId=7&resource=147043.pdf
    (我都未有時間慢慢研究呢篇文，不過初步睇黎幾有趣)


    有師妹曾經回報(原文照錄)，中國文化科向中六新人講解做報告安排時，方某的報告被當成範本傳閱……
    某學生﹕「嘩﹗淨係參考書目都咁長，點搞呀﹖﹗」
    敬愛的陳 sir﹕「呢個方富潤係變態架，你地唔使跟。」
    (聽完後的我﹕)


    哼﹗可見幾變態既野，都自有其用。
    (當然唔係指俾後輩「抄考」啦)