June 26, 2005

• 幾乎都係講尋日既事，因為尋日冇時間，更因為預期今日冇乜事。
  (有時間都睇下有冇心情搞埋選舉附則好過啦……)

  
  

  一個好搞笑既公仔，不妨分享下﹕

  
  

  據聞係家母同事買朱古力送既，前面係一個樣衰衰既男人，後面寫住「衰佬」兩個字。
  背脊仲有「任篤」二脈，穴位包括有「死撐」、「大舊衰」、「懶鬼」、「大男人」、「幼稚」、「冇品」、「小器」、「無聊」等。

  
  

  絕對值十個笑字，適合各位女士出氣用。

  
  

  -------------

  
  

  [評議會遊記之二]

  
  

  如果唔係世澤兄參選，抱住「有戲睇」既心情，我絕不會第二次去評議會。(因為實在悶到抽筋—仲悶過代表會，去過一次都怕，你估真係貪有西餅食咩……)

  
  

  不過呢個「元老政治」既校友世界係需要有人衝擊下既，平時得小貓幾隻既評議會，竟然俾一個黃世澤釣左咁多人出黎。我直頭覺得好似去左學生會老鬼聚會。(主席話想次次都咁熱鬧﹖好簡單o者，叫世澤兄年年黎選咪得囉。)

  
  

  最搞笑既係，組織人為了貼近列席既學生會代表，幾乎全部坐在會場右側，班「前輩」就坐晒o係左側。我都坐左o係左側(冇乜特別用意，反正我只係「邊緣」組織人啦)，仲有另一位(後黎先知係李學斌兄)坐左我前面。話係左翼右翼都講得通，但係好似調轉左喎……
  經曾嶸兄點醒﹕係喎﹗從主席台上睇落去，班學生會老鬼的確o係左邊，而班前輩o係右邊。

  
  

  同場加映﹕師兄弟相認
  吳幹事﹕「你係方富潤﹖」
  我﹕「係，咩事呢﹖」
  吳﹕「你讀邊間中學﹖」我答左佢。
  吳﹕「我都係果度畢業。」
  不過佢今年先 year 1，差成五年，我離開圖書館果陣佢先岩岩入中學。
  我﹕「你點識我架﹖」
  吳﹕「因為上網搵代表會D章則資料，睇到你個網頁有好多中學既資料出現。」
  乜原來依家連幹事都去研究章則架咩﹖
  我以為淨係章委先會做呢D野添。

  
  

  另一點幾好玩既係，為左搞大會，大學調動左唔少人黎幫手。而大家都認出一位叔叔……好簡單，因為你返學咁多年，日日都會見到佢o係火車站指揮校巴交通。(連交通組既人都調埋黎﹖)

  
  

  組織人既政治同說話方式，見過不少，甚至見怪不怪。
  不過原來有D老人家真係冇乜耐性兼冇包容度，除左世澤兄聲稱常委會「黑箱作業」後某常委大鬧「簡直係侮辱﹗」，仲有會上學生會某老鬼講完野之後有個阿婆o係後面鬧佢(記唔清楚鬧乜)，總之感覺好似去左維園。
  有D咁既質素既學長，難怪先前會有人出言要脅班幹事啦﹗
  (有位師兄聲稱彭某平日為人有禮，一定係因為雙方吵得太僵先會出言不遜。我知道組織人「纏人」的本領確實麻煩，不過彭某位居高層，冇理由 EQ 咁低掛﹖老人家發脾氣都仲可以理解，出言恐嚇班師弟就點都講唔過去，連講出口都已經算卑鄙。)

  
  

  世澤兄同日提出的討論題目，其實跟他的政綱(因為電腦開不到，我到當日才看到世澤兄的政綱)很有關係。小人之心﹕選舉策劃的一部分。
  不過我覺得講包容係浪費時間，因為呢個心態問題根本冇辦法靠會議解決。主席梗話包容架，何況恐嚇人果位根本就唔係常委。我覺得倒不如爭取讓學生會代表常規性列席好過。
  主席話當日(史稱「430事件」)因為有好多校友想發表意見，所以先唔俾學生列席，我諗黎諗去都唔明。
  我同意校友討論會當然係俾校友發表意見既地方，學生會要發表意見可以自己發聲明。邀請學生會代表同場發表意見當然更好，不過根據會議常識，列席者不必然有發言權。所以學生會有代表列席，根本不必然會妨礙校友發表意見。
  尤其如果評議會真係想俾多D學生了解評議會、日後多D校友參與評議會活動，咁俾學生報同電台同學列席就更必不可少。中大學生唔會睇《中大校友》，亦未必留意大眾報刊既報導，但係《中大學生報》同校園電台既報導，仍然會吸引到同學留意。既然佢地主動要求列席，呢個絕對係宣傳評議會既機會。俾學生會同校方高層一樣有機會發表意見(你可以限制發言時間)，換取學生報同電台既報導，都係一場交易o者。(呢段野我想講，但係現場太「熱烈」，我根本沒機會講……)

  
  

  不過見到另一位保皇黨參選者在「默默耕耘」，早就找到人幫她收集授權票。見到她的朋友一手拿出十幾廿張授權票的一刻，倒令我有點震撼感。
  我不反對授權票，不過一個人可以投五十張授權票的規定實在有點過分。試想想﹕評議會開會好多時都係幾十人既事，一個人單憑授權票就可以 override 在場所有人﹖
  (呢位保皇黨人據聞係葵青區民選區議員，不過當佢「窒」一位組織人，說她係青衣而唔係葵涌出選既時候，我倒奇怪為何好像沒聽過這個人﹖)

  
  

  自從見到授權票既威力，我地都唔會去睇世澤兄選唔選得出，因為果兩位前輩實在太多授權票，兼且有在位既「慣性收視」，根本冇得贏。我地反而想知道世澤兄得票贏唔贏到保皇黨。
  (在場組織人閒偈﹕
  「照計黃世澤o係都市日報成日寫野，應該好出名先係丫」
  「佢又唔係日日寫」
  「不過就算唔係日日寫，佢個名都同梁文道日日一齊出現架啦」
  「可能D人睇完娛樂版就夠鐘落車，根本冇睇論壇版就丟落回收箱呢 」)

  
  

  幾好玩既係，點票中竟然發現有幾張選票同時投俾世澤兄同保皇黨。可見選出「左派總統右派總理」也不只是法國會發生的事。

  
  

  授權票投得早，通常沉晒底。於是點票時當世澤兄拋離一段時間後，就被洶湧而上既授權票淹沒。以十六票之差輸俾保皇黨。
  不過，在場有百人多，世澤兄都有 103 票。就算扣除世澤兄既少數授權票，應該還得到不少在場人士支持。而且又冇保皇黨既動員能力，輸十六票也不算丟臉啦。
  (世澤兄第日記得多D搞荔枝團同海鮮遊啦 )

  
  

  「430」果然係一個爆炸性既題目，於是「組織人」纏住班「前輩」不放，而班「前輩」又一直想說服班組織人，一路嘈到夠鐘交場為止。
  當聽到成班組織人同前輩們走入同一部電梯既聲浪水平，學斌兄同我即刻作出一個明智既決定﹕等過下一部。

  
  

  後來跟另一前輩同電梯，他又談起這個題目。
  他當我是學生會幹事(你有見過幹事著恤衫西褲架咩﹖)，不斷想說服我常委會的決定沒問題。我也提出了自己的看法，雖然我相信最後不會有誰說服誰。(我也沒想過去說服他，說了看法就算)

  
  

  最後佢同我講﹕「……正如我地班校友都唔係鍾意就話去學生會列席架。」
  我﹕「其實係可以架，而且真係有人成日去(果班學生會老鬼)。」
  睇到佢個樣，我諗佢都唔係好理解。呢兩班人係兩種文化、兩個世界。
  好彩我唔屬於任何一邊，o係兩邊都係旁觀者。走走看看，說完又走。

  
  

  結論﹕
  俾幾十蚊車錢，睇左半日戲。
  名副其實係「一張票睇到笑」

  
  

  -------------

  
  

  今日小語﹕

  
  

  1. 我習慣拗頸，但係我確實唔係鍾意嘈交。
  錯左既野歡迎指正，但係我唔認為要清楚晒內情先講得野。

  
  

  否則所有時事評論(唔止報紙，包括埋 blog)都可以收檔，因為冇幾多人知道裡面發生緊乜事，大家都係斷估。「分會室事件」就好似所有政治事件，都一樣有「戰爭迷霧」，就算身在其中都唔清楚全貌(就算動漫人都唔可能真係知道晒代表會裡面既野，否則唔會有咁多陰謀論 )，何況外人﹖
  好評論同壞評論既分別只係「估得合唔合情理」同「係咪符合事實」而已。

  
  

  我唔講出黎，你點知我錯﹖你唔指正我，我點知我錯﹖
  諗左唔出聲，其害可知。
  唔使俾人鬧好舒服，但只係蔽帚自珍。

  
  

  2. 收到「圓桌」召集人沈兄的邀請，受寵若驚。
  我呢個咁鬼亂既日記都竟然咁多人睇，難怪poe同雲會話驚俾人睇，又難怪芳傑兄會話我坦白得過分。(事先聲明﹕我唔係露體狂黎架 )
  雖然明知佢會睇到，不過都唔怕佢知道﹕我未諗到點回覆。

  
  

  很早時收到「入會表格」，驚見「研究專長」一項……想方某「通識」得學而不專，根本無專長可言(冇理由填「吹水」架 )。思前想後，沒有填完。(反正我也沒想過要投入去幫「圓桌」做甚麼)

  
  

  日後見到圓桌通訊的評論文章，怎樣看我也不可能寫到這種水平(如正兄所言，我鍾意唔清唔楚就大發謬論架嘛 )。「入會」這兩個字更變成辭典裡不存在的詞。

  
  

  想我小薯，實在沒甚麼值得圓桌「羅致」的道理。

  • 5:31 am
  • 3 Comments